பிறந்த நாள்

வயதைக் குறைத்துரைக்கும்     
ஒற்றை நாடி உடம்புடையாள்,
ரங்கனுக்கும் ராசாமணிக்கும் 
மகளாகிப் போயிருந்தாள்,
பட்டிக்காட்டுக் கட்டுப்பாட்டிலும் 
எட்டாம் வகுப்பு படித்திருந்த
சரசுவதி தேவியவள்,
ஓங்கிப் பேசிவிட்டால் 
ஓரக்கண்ணில் நீர் வடிப்பாள்,
அவமானங்கள் அத்தனையும் 
அன்புக்காக அரவணைப்பாள்,
ஆதங்கங்கள் நிறைய உண்டு - ஆனால்  
அறம் மட்டும் தவறியதில்லை,
அதிர்ந்தும் பேசுவதில்லை,
வாழ்க்கை என்னவென்று 
வழக்காடும் விருப்பமில்லை - ஆனால் 
வாங்கி வந்த அத்தனையும் 
வங்கிபோலக் காத்திடுவாள்,
பேரன் பேத்தி வந்துவிட்டால் 
துள்ளித் திரிந்திடுவாள்
துடியாட்டம் போட்டிடுவாள்,
பசியறிந்து உணவளிப்பாள் 
பாசத்துடன் விருந்தளிப்பாள் - என்னப்பன் 
குமரேசனின் குலசாமி
எனக்கும் அப்படியே, 
தன்னுடைய  சாயலை
எங்களுக்கும் அப்பிவிட்டு 
அரவணைத்துக் காத்திட்ட 
அவள்...
என் தாயாகப்  
பிறந்த தினம்!