வியனுலகு

வியனுலகே  
இனி அவனுலகு - அங்கே 
தூரங்கள் சென்று சென்று 
எல்லைகள் பல கடந்திடுவான் - பின் 

எல்லைகளைப் பொடியாக்கி 
ஓர் உலகம் செய்திடுவான்,
காலத்தின் கணக்குகளைக் 
காலடியில் மிதித்திடுவான்,

தீராத  வினையெல்லாம் 
தீயிலிட்டுப் பொசுக்கிடுவான்,
சாதனைகள் செய்திருந்தும்
சாந்தத்தில் வீற்றிருப்பான்,
மாறி மாறி உருவெடுத்து 
நம்மிடையே வாழ்ந்திருப்பான்,
மகத்தான வெற்றி பெற்று - நம் 
மனங்களிலே நிலைத்திருப்பான்,

அவனுலகு வியனுலகு 
அவனுக்கானது - அவ்வுலகில்  
வலியில்லை 
துயரில்லை,
பிணியில்லை 
பயமில்லை,
கலக்கமில்லை 
கடமையில்லை,
கண்ணீர் என்பது - இனி 
இல்லவே இல்லை,
ஆசைக்கும் அளவில்லை - அதை  
அடைவதற்குத் தடையுமில்லை 
ஆதலால் 
மகிழ்ந்தே இருப்பான் மகிழன்
 வியனுலகில் - இனி 
 என்றென்றும்...

"மகிழ்ந்தே இருப்பான்  மகிழன்"