வேட்பாளன்

வானிருந்து வந்திடுவான் 
வாசலிலே தவமிருப்பான்,
தயங்கித்தான் நின்றுவிட்டால் 
தாழ்பணிந்து  வணங்கிடுவான்,
தன்மானம் விற்று வைத்தக் 
கூட்டணியைப்  போற்றிடுவான் - உன்
கட்டளைகள் ஏற்று அதைக் 
கடமையெனச் செய்திடுவான்,
யாதும் நீயென்பான்
யாவரும்தான் கேளிரென்பான்,
உத்தமனாய் வேடமிட்டு 
உன்னுரிமை திருடிவிட்டு - உன் 
எதிர்காலம் தொலைத்திருப்பான்,
வெகுளித்தனம் மாறாமல் - நீயும்
வெள்ளந்தியாய்ச்  சிரித்திருப்பாய்!

சனநாயகம்

தமிழகத்தின் 

தலை மாற - அரசு 

நாளொன்றை 

முரசு கொட்டும்,

குறி சொன்ன அந்நாளில் 

உன் விரலில் - கரை 

வந்து கட்டம் கட்டும், 

இனி

பிரச்சாரப் பீரங்கிகள்

தினம்  வெடிக்கும்,

குரங்குடன் கழுதைகள்  

கூட்டமைக்கும் - உன் 

வாக்கை விழுங்கிவிட்டுக் 

கொட்டடிக்கும்,

வென்றபின் கூட்டில் - வெடி 

வெடிக்கும்,

வெடித்தவுடன் பன்றிகள்  

இனம் சேரும் - பின் 

சனநாயகம்

கொஞ்சம் உதைக்கும், 

கொஞ்சம் கணைக்கும்,

பிறகு மரம் தாவும்,

பிசகி மலம் தின்னும்!